दाह विरही क्षमवाया
मी चंद्र उशाला घेतो l
तरीही आठव अग्नी
भडका उरी का घेतो.....?

रवीन्द्र खानंदे....

HOW TO TIE BHANGRA TURBAN: RIFAC INDIA (Rhythms International Folk Art C...

How to Tie a Turban

How to Wrap a Rajasthani Turban

How to Wrap a Rajasthani Turban.

Rajasthani Turban How to tie one

अभंगानंद

सागराने गावे

गीत जीवनाचे

संगीत प्रेमाचे

जगा द्यावा

आकाशाने द्यावे

भरून आभाळ

मायेचा वर्षाव

जगा द्यावा

फुलांनीही द्यावा

गंध जीवणाचा

आनंदाचा कंद

जगा द्यावा

रविने ही द्यावी

ओतून सकाळ

प्रकाश सकळ

जगा द्यावा

रवींद्र खानंदे

वारे तुझ्या स्मृतींचे...

आकाश  चांदण्यांनी बहरुन आज गेले

वारे तुझ्या स्मृतींचे स्पर्शून आज गेले

मल्मल तुझ्या स्मृतींची हूंगतोच आज आहे

हे ताटवे फुलांचे बहरून आज गेले

तो दीप तेवतांना मन जाळतो कितीदा

ते तार सप्तकांचे  छेडून आज गेले

मी ऐकतोच आहे ते गीत भैरवीचे

ह्या फाटल्या मनाला जुळवून आज गेले

मी पांघरून घेतो मऊशाल ही धुक्याची

आभास ग तुझे ते भुलवून आज गेले

पाऊसपान

किती केले पाऊसपान

भागली नाही माझी तहान

एक थेंब दंवाचा

एक थेंब पावसाचा

केली तुलना किती वेळ

नुसता झाला पोरखेळ

दंव गेले उडुन

पाणी गेले विरुन

पाऊस असतो तुझ्यासाठी

घडवून आणतो कधी गाठी

करावे का पाऊसपान ?

तुला पण लागली असेल तहान......!

-रवींद्र खानंदे

खूणगाठी 

तुझ्या पावलाने बाटलेला गाव

कसा हा लगाव लागलेला।

मुक्या मुक्या रडे अबोल निंभोर

मागे चितचोर लपलेला।

निघाली पालखी गाव झाले खाली

पिंपळ सावली रडे किती !

देऊळमळाले विटले हे रंग

पूर्णेचे तरंग शोधू कोठे ?

हरवला गाव स्मृती झाली अधू

आता कोठे शोधू खूणगाठी?

                                                          .........................  रवींद्र खानंदे

 

 

आभाळ पान्हा.....

हरवला गाव
कुठे शोधू खुणा
पुर्णाकाठ सुना
सुकलेला

गेली गेली कुठे
आभाळ सावली
नाही ती गावली
आसपास

राहिले गर्भार
केवडयाचे उन्हं
वसंताचं तान्हं
प्रसवेल

सुवास कस्तुरी
भन्नाट सुटला
छातीत दाटला
ओला पान्हा

--- रवींद्र खानंदे, चिखली

 || स्मृतीचे देऊळ ||

गजर दिंडीचा
ऐकू येई कानी
तुकयाची वाणी
कोण गाई ?


दुरचे ते दिवे
लावतात कळ
मनी तळतळ
येथे माझ्या


गंध चंदनाचा
हुंगतो अजून
मनात भिजून
गेलो आता


दाटले दाटले
केवढे आभाळ
स्मृतीचे देऊळ
भिजलेले


रवींद्र खानंदे,
चिखली.

पावसा तू असा ये....

थेंब टपोर घेऊन उधळत घोडयासारखा
तापलेल्या भुईवर मोती सडा शिंपीत ये.....
रुणझुणत्या पैजणांनी नाचत कृष्णासारखा
कस्तुरी चा सुगंध घेऊन ये......

झाडातुन घोंघावत मोर पिसारा फुलवत
नदीकाठच्या बोरबनातून तू असाच लोळत ये.....
उललेल्या शेतातुन शिवारातल्या आमराईतुन
मृगधारा गुंफीत ये....

.......... रवींद्र खानंदे

चंद्र अमृताचा

चंद्र अमृताचा

तुझ्या स्मृतीत नहाला||

हलाहल कंठी

जीव कासाविस झाला||

चांदण्याची रात
धुके सुगंधी अंगणी ॥
देवळात दिवा
झुरतो मनोमनी ॥

-रवींद्र खानंदे

 

॥ पंढरी ॥

विठूच्या राऊळी

नामाचा गजर

भक्तीचा सागर

भरलेला

संचारला त्यांच्या

अंगी पाडुरंग

मनात तरंग

भक्तीचे ते

कोण रुखमाई

कोणता विठ्ठल

कोण ओळखल

आज येथे

थाप मृदंगाची

घुमे वाळवंटी

नाम दाटे कंठी

भक्ताचिया

अद्वैताचा येथे

आला अनुभव

भक्ती चिरंजीव

विठ्ठलाची

धन्य झाले आता

देवा तन मन

दुःखाचे सरण

नको आता

 || रवींद्र खानंदे ||